Cá Beleño: música y hestoria

Una jam session nel Cá Beleño. Semeya / Mario Rojas.

Una jam session nel Cá Beleño. Semeya / Mario Rojas.

Nacho Llope / Lletrista y músicu.

Si bien el chigre Cá Beleño abrió puertes nel añu 1987, lo cierto ye que nació enantes, en mayu de 1984. Y ello ye que nesi mes entamaba na Ciudá de los Prunos –esa ye la traducción del gaélicu Cill Áirne (Killarney)– el Pan Celtic Festival, ellí n’Irlanda, nel condáu de Kerry. A esi festival viaxó una delegación asturiana: Ástur Paredes y Lisardo Lombardía, miembros del Conceyu d’Estudios Etnográficos Belenos y el noyu de lo que sería un grupu básicu na música asturiana del sieglu XX, Beleño: Xuan Prado, Frankie Delgado y Fernando Largo, quien col tiempu fundaría un chigre, otru templu de la música y la cultura asturiana, “La Cadorna”, desgraciadamente pieslláu de magar años.

Pues bien, ente’l tresmontoriu d’actividaes de la delegación asturiana una d’elles yera tocar pelos chigres, tocar pelos pubs qu’enllenaben la ciudá. Amás de descubrir la Guinnes y les sos múltiplers virtúes, esos conciertos, alcuando formales, con convocatoria pública y equipu d’amplificación,  la mayoría de les vegaes yeren improvisaos nunes jam sessions a les que se diben amestando veceros del pub con más o menos xeitu, pero siempre cola alegría de compartir la música tradicional irlandesa, y del resto de la Europa celta. Neses jam sessions d’aquel yá llonxanu 1987 fonon filándose les primeres amistaes musicales ente asturianos, irlandeses, bretones o escoceses; amistaes que de magar entós una y otra vuelta tienen nel Cá Beleño ún d’esos llugares de referencia na Europa atlántica, al que nun ye raro ver acudir a músicos col so instrumentu al llombu col envís de compartir música, de compartir vida con quien-y pete sentase al llau ya imprimar una balada, una d’eses que falen de la distancia de quien dexa la casa valera baxo la solombra amable de los carbayos.

Foi nesos pubs irlandeses nos que Xuan y Frankie escomenzanon a falar d’armar un chigre n’Uviéu, un bar que fora pub y chigre al empar. Un llugar pa la música, pa la cultura asturiana, pero tamién pa la folixa, un llugar dende’l que ver pasar la vida: un llugar al que volver como’l que volve pa casa. Asina nació lo que güei ye’l Cá Beleño. Porque non por casualidá el bar tien el mesmu nome del grupu nel que tocaben Xuan y Frankie, porque’l chigre surdió dende la música y fundáu por dos músicos, a los que s’axuntó Atilano, un collaciu de Mieres que yera mienbru del grupu d’investigación folklórica l’Aniciu.

Asina que nun ye posible pensar nel Cá Beleño ensin pensar na música. De fechu, a lo llargu d’estos cuasi trenta años, los conciertos cellebraos fan una filera llarga en xente y en calidá de lo meyor de la música celta europea, pero non solo, pues la programación del chigre yera y ye abierta a tolo que seya bona música.

Pero si los conciertos son importantes, algo que define al pub son les jam sessions, yá programaes selmanalmente, pero tamién les sesiones improvisaes en cualisquier día, ensin otra sida que les ganes de tocar y compartir música: son yá mítiques delles d’eses sesiones improvisaes tres conciertos de xente que vei de Capercaillie, Llan de Cubel o Luar na Lubre, por citar trés referentes indiscutibles nel so campu.

La posibilidá, solo la posibilidá, que por una zuna alministrativa depués de trenta años se ruempa cola presencia de la música en vivo nel chigre de la cai Martínez Vixil ye una d’eses situaciones que namás son a entendese con dificultá.  Una norma alministrativa absurda pue ser quien pa torgar la continuidá de la música en vivo en culisquier local que nun seya una discoteca. Y ye qu’esa norma absurda tamién pue ser un eficaz instrumentu pa la xentrificación de los centros hestóricos de les ciudaes, espulsando delles actividaes non convenientes pa los nuevos vecinos –mentanto’l vecindariu tradicional vei esaniciándose pola mor de la xuba del valir de los pisos–, pa la nueva ciudá ordolliberal segregada socialmente, (des)regulada por un mercáu de too menos ciegu.

Y amás nun contestu hiperegulatoriu que dende l’Alministración autómica vei entetexendo una trupa rede de normes estúpides, que namás se xustifiquen dende la propia necesidá burocrática xenerada por quien la llexisla, y que fai la vida poco menos qu’imposible a una ciudadanía asturiana asorada énte una situación incomprensible. Esta rede alministrativa que de vei trenta años d’Autonomía cada vuelta vólvese más intervencionista na vida de la xente, que cada vuelte xenera una burocracia cara ya ineficiente, ye ún de los principales argumentos de la deslletiximación del sistema autonómicu en cada vuelta más sectores sociales.

Una consecuancia perversa, y tamién paradóxica, pues una de les mayores virtúes de la descentralización sería l’averamientu de l’Alministración a la ciudadanía: y resulta que lo único que percibe esa ciudadanía a la vera ye toa una riestra de normes que-y amarguen la vida. Consecuencia lóxica de trenta años d’un réxime clientelar que xenera na so propia esistencia esa necesidá normativa hipertrofiada no innecesario. Y ehí tienen los actores de lo que se tien como nueva política una bona xera, pues l’acosu al Cá Beleño nun ye más que’l resclaviu d’un mal más fondu, y que vien de la propia construcción del sistema autonómicu asturianu.

Nun queda más qu’esperar qu’esti desgraciáu asuntu se resuelva acordies, de la única manera posible: que volva la música a la so casa, que volva a sonar llibre pa que llibremente la xente la disfrute y comparta. Si la música calla, si’l silenciu posa nel patiu, ente les muries del Cá Beleño, será’l badagüeyu d’una ciudá silenciosa, sí, pero muerta.

Deja un comentario