Francisco Álvarez: Periodismu versus corrupción

Paco Álvarez ACFoi nel Sieglu de les Lluces cuando la llibertá d’imprenta y de prensa ganó les primeres batalles n’Europa y n’América. Al pastor protestante y parlamentariu Anders Chydenius debémos-y la primer llei qu’amparaba’l derechu a la llibre información, promulgada en 1766 pol Riksdag, l’asamblea del Reinu de Suecia na que taben representaos los cuatro estamentos sociales: aristocracia, cleru, burguesía y campesináu. Llamáronla Acta de Prensa y aprobáronla al empar que la llei de llibre accesu a la información de rexistru público, qu’establecía’l derechu a conocer los documentos tramitaos polos gobernantes. Nos años siguientes, la Revolución de les Trece Colonies, que supunxo’l nacimientu de los Estaos Xuníos, y la Revolución Francesa, que destronó al Antiguu Réxime, valieron p’afondar nel deber d’informar y nel derechu a saber.

Sicasí, enantes de too ello, la primer victoria xudicial de la llibertá de prensa producióse en Nueva York, en 1734. Un editor d’orixe alemán llamáu John Peter Zenger acabó en prisión polos artículos y rimes satíriques coles que, dende’l periódicu New York Weekly Journal, denunciaba los chanchullos del gobernador de la colonia. Acusáronlu de libelu y encarceláronlu, pero la so muyer, Anna Zenger, caltuvo en marcha la rotativa pa esparder nueves crítiques contra’l gobernador y pa publicar los artículos que’l so maríu unviaba dende la cárcel. Al cau d’ocho meses de prisión, un xuráu declarólu inocente.

N’otru territoriu del Imperiu Británicu, la India, surdieron tamién naquella centuria voces revolvines a traviés de la imprenta. Una d’elles foi’l selmanariu Hicky’s Bengal Gazette, fundáu en 1780 en Calcuta pol irlandés James Augustus Hicky. Malpenes sobrevivió dos años y la so tirada yera d’unos pocos cientos d’exemplares, pero nesi curtiu periodu y con esa ruina difusión ganó la enemistá del gobernador y de la so esposa, que yeren los principales destinararios de les crítiques. A Hicky tamién metiéronlu ente rexes, col cargu de difamación, y dende la celda siguió denunciando la corrupción y el mal gobiernu hasta que’l mandatariu colonial ordenó que confiscaren la so imprenta.

Presentóseme la oportunidá de rescatar estos y otros casos pa un capítulu del llibru La tierra de la libertad. Crónica de los derechos humanos y civiles en el mundo y he d’almitir que soi un periodista pocu propensu a guardar les distancies anímiques a la hora d’escribir; hai munches histories que m’emocionen o me conmueven. A fin de cuentes, el periodismu meyor encaminao nun ye’l que s’envuelve na bandera de la oxetividá, sinon el que s’exerce con honestidá.

Dende aquel Sieglu de les Lluces hasta esti ‘Sieglu de la Ceguera’, nel que davezu confundimos información y opinión con propaganda y mercantilismu, foron milenta los episodios de tira y afloxa que llibró’l periodismu llibre y independiente col poder políticu, económicu, militar o relixosu. Nestos tiempos nuevos y n’apariencia menos xabaces (quiciaes solo n’apariencia) yá nun ye necesario poblar les cárceles con periodistes, editores y impresores pa tentar d’amedranar o afogar les voces picoteres; ye más operativo corta-yos la yerba baxo los pies a los informadores disonantes. Resulta chocante esi espaciu en blancu que dalgunos quieren esparder alrodiu d’ATLÁNTICA XXII: los medios de comunicación clásicos -combayones col poder o, nel meyor de los casos, roceanos respecto al deber periodístico de pisar charcos- faen el vaciu informativo cada vez qu’esta publicación sopelexa un casu sonáu de corrupción y hai empreses que nun s’anuncien nestes páxines pola medrana a caer en desgracia.

Y el casu ye que, contra’l silenciu y el mieu, como dicía’l cantar de Nuberu, sigue en pie esta revista que milita nesa cosa tan poco aplaudida que se llama periodismu d’investigación, col enfotu de dir ganando metros que nos averen a un destín en tou casu inalgamable: una sociedá ensin corrupción. Oxalá nun llegue’l día en que tengamos que llamentar que fuimos una ciudadanía tebia y feble a la hora de defender, delantre del poder y del mercáu, la pluralidá informativa y la sobrevivencia de les voces incómodes, dalgo polo que munches persones en munchos llugares sacrificaron la vida, la facienda, la fama o la llibertá.

PUBLICADO EN ATLÁNTICA XXII Nº 29, NOVIEMBRE DE 2013

Deja un comentario