Llobos con pelleyu de payasu hipster

Una manifestación pola oficialidá de la llingua asturiana. Semeya / Mario Rojas.

Nicolás Bardío / Politólogu.

Na dómina de la posverdá na que mos tocó vivir, tenemos que face-yos frente a bien d’enemigos. D’una banda tán esos que, na llinia d’Orwell, empleguen y retuercen la llingua (castellana, por supuesto) hasta’l puntu de defender la llibertá llingüística torgando la oficialidá del asturianu. Del nun dexar votar pa defender la democracia pasemos al nun dexar falar pa defender la llibertá llingüística o a violar la Constitución pa facer que se cumpla.

Neto que’l pa que-y solmena al fíu pa que nun-yos pegue a los otros escolinos o que l’home que maltrata a la muyer “por amor”: neses tamos. Esautamente lo mesmo que pasó con Orwell y el so ministeriu del amor que prauticaba la tortura, o’l de la verdá qu’esborraba les informaciones que nun-y veníen bien al poder (como fai Antena 3 cuando esborra nos sos reportaxes que más de la metá de los asturianos tamos a favor de la oficialidá de la nuesa llingua). Pero como dicimos, el mayor enemigu nun ye’l que prohibe llingües pola llibertá d’usu o torga’l votu por defender la democracia. El peor de toos ye ési que paez de los nuesos pero a la fin nun lo ye. El “que soy compañero, coño” del policía infiltráu llega muncho más lloñe de les fuercies y cuerpos de seguridá del Estáu.

Va delles selmanes Edu Galán, de la revista Mongolia, dicía qu’había más problemes n’Asturies que l’asturianu como –daba él como exemplu– la llucha de los trabayadores de Correos por ameyorar les sos condiciones llaborales. Contestáron-y nes redes con semeyes d’esos mesmos trabayadores llevando pancartes n’asturianu, amosando a les clares qu’ún nun dexa de defender la clas obrera, o’l feminismu, o la llingua, o l’antirracismu por defender otra causa más. Que toes elles son causes xustes que paguen la pena y que l’argumentu de “la prioridá” ye da-y la razón a la derecha ye nun entender qu’hai milenta opresiones qu’actúen al empar (de xéneru, de llingua, de clas social, de raza… etc.). Nun paeció entendelo nin Edu Galán nin el so mediu, que cargaron escontra una de les persones que-yos plantemos cara: Victor Suárez, coordinador de la estaya Faciendo País d’Izquierda Xunida, al que llegaron a acusar, oh bendita posverdá (que ye la mentira pero cuando la dicen estos payasos hipsters), de ser de dereches.

Victor Suárez ye una de les persones más comprometíes qu’atopé na vida y que tuvo en bien de lluches, delles conmigo, otres ensin mi, y en toes elles col más puru altruismu militante, hasta’l puntu de que si l’asturianu tien una de les wikipedies más potentes qu’enxamás tuviere una llingua minoritaria ye nuna gran midida gracies al so trabayu desinteresáu, idealista y militante: dalgo que nun tien, nin tuvo nin paez que vaiga tener nunca Edu Galán nin nengún otru de los payasos hipsters que tán en Mongolia, esa revista fecha por persones que nun militen en más causa que’l faltosismu y que puede permitise facer chancia de too pero cola que naide nun puede metese ensin esponese a un escrache.

Pero nel comportamientu d’Edu Galán y de los otros “mongolos” nun hai solo una clara intencionalidá de nun entender que la nuesa llingua nun ta n’oposición a la defensa de los derechos llaborales, la llucha feminista o l’antirracismu. La esplicación de cómo estos llobos con aspeutu de payasu hipster disparen al asturianu hai que la atopar n’otru llugar, concretamente en quién paga a Edu Galán. ¿Quién-y paga? Dexo la entruga nel aire pa que seya’l llector el qu’apuerte a les sos propies concluxones, pero convién nun escaecer qu’igual dellos medios pa los qu’Edu Galán tien yá trabayao o trabaya anguaño nun tán tan comprometíos coles lluches sociales como-y prestaría facenos creyer.

Y ye qu’al final ún puede da-y caña al rei y a los políticos, que son toos ellos reemplazables y decorativos, y al facelo siguir afitando un modelu que prime a les muyeres, les llingües minoritaries, los derechos civiles y sociales y a les minoríes. Too ello, evidentemente, con muncho confeti, munches sorrises y munches defenses del diálogu, la llibertá y la democracia en Twitter (anque depués te bloquien, como me bloquiaron a mi, por dici-yos ehí coses como les qu’equí escribo). Estos son los llobos con piel de payasu, guardáivos d’ellos, porque vienen con fame masque los sos dueños-yos dean bien de comer.

Deja un comentario