Periodismu, poco más que’l circu

Ilustración / Alberto Cimadevilla.

Nicolás Bardío / Politólogu.

La Democracia n’España ta faciendo agües. Ye daqué nidio auquiera que tea ún nel espectru políticu. Da igual que se seya d’esquierdes o de dereches, la creyencia de que tenemos unos políticos que nun nos merecemos y de que la democracia qu’hai ye d’una calidá bien probe, xeneralizóse y vien siendo hexemónica dende que’l 15-M fora quién a ponela enriba la mesa.

Dellos van dicir qu’esta falta de salú democrática débese a la corrupción, otros dirán que ye la falta de participación ciudadana, les llistes abiertes o que les eleiciones primaries nun son la norma nos partíos. Agora, depués del referéndum d’autodetermín catalán y de la inxustificada y tarrecible represión policial, habrálos que digan que la culpa ye de la llixereza cola que s’empleguen los toletes nesti país. Toes estes coses nun dexen de ser verdaderes y, o son les exes del alderique políticu d’anguaño, o foron temes importantes nel ciclu eleutoral qu’entamó coles autonómiques de 2015 y aínda paez que nun acabó dafechu. Pero hai daqué peor. Daqué aínda más grave que too esto: el periodismu.

Un espectáculu

La política ye una distancia; una distancia pergrande ente la realidá y la ficción, ente la utopía y los datos, ente’l discursu sentimental y el falar monótonu del espertu, ente’l programa eleutoral y la llei. Pero, de toes eses distancies que conformen la política, ye la del periodismu la más grande de toes elles. D’un llau, el periodismu como “debería ser”, y, d’otru, como “ye”. El “deber ser” ye cenciello de resumir: un cuartu poder que fiscalice al poder, que seya, como nel cantar, “grandón col altaneru; pequeñu col humilde”. Un poder, en definitiva, que caltenga a raya a la corrupción, qu’amuese les partes más fees y escures de la política y que faiga por da-y lluz y claridá au el poder nun quier más que solombres.

Albert Rivera foi en porrica nun cartel eleutoral, porque yera la única manera de que falaren d’él. Carolina Bescansa dio-y de mamar al so fíu nel hemiciclu del congresu porque yera la única manera de falar de conciliación. Los militantes de la Xunta pola Defensa de la Llingua antroxábense de pita porque yera la única manera de falar de la represión llingüística que carecemos nesti país. HazteOír tuvo qu’allogar un autobús y una avioneta pa que se falare de les sos idees tránsfobes y Podemos un autobús pa falar de corrupción ya imprentar un catálogu d’IKEA pa falar tamién del so programa. Susana Díaz y Pedro Sánchez fixeron falar del socialismu por mor del culebrón que montaron d’amor y desamor, con xiros de trama inesperaos, como Javier Fernández garrando les riendes d’una xestora. Miquel Iceta tuvo que marcase un baille pa que toos supiéremos qu’esistía. Y éstes son, dames y caballeros, les portaes d’una sociedá que s’informa per aciu de programes de risa como El Intermedio y de tertulies nes que la cosa va de ver quién ye a glayar más fuerte.

Quédanos el circu

Lo demás nun val. Lo demás ye “gris”, nun da más que seya tamién importante. Lo que fai falta ye daqué llamativo, espectacular, interesante, novedoso, multicolor y con brillantinos. Si ye serio, si ye importante, nun val. Falamos de los muertos pol terrorismu y de les sos vides, y non de les causes. Falamos del fíu de Bescansa, si ye preciso que lu llevare o non, y non de les xornaes partíes qu’esfarapen la vida social de milenta trabayadores. Lo que ye aínda peor, dacuando criticamos a estos políticos por “facer el paripé” o, direutamente, el monu, pa que se fale d’ellos. Llamámoslos ególatres y payasos y nun nos decatamos de que va tiempu yá que dexamos d’informanos de les coses importantes si nun tienen una bona dosis de rareza, espectacularidá, emoción o controversia.

Lo importante d’esta democracia –o de lo que queda d’ella– ye’l tonu y non el conteníu, la puesta n’escena y non la hestoria, l’iconu y non el programa. Cuando lo importante, lo relevante y lo político dexa pasu a lo aneudótico, a lo entretenío y a lo grotesco, entós dexamos de tener periodismu pa tener otra cosa, l’“infotainment” del que falen los americanos que nun fai más que sustituyir l’ágora pública na que se debate, s’aprende y se critica por una gran feria de muestres na que s’intenta timar al que vien. Arrenunciamos al periodismu y, al facelo, arrenunciamos tamién a la democracia. El Senáu y el Pueblu de Roma teníen pan y teníen circu. Nós yá nun tenemos pan y del “Senáu” va quedándonos poco más que’l circu.

PUBLICADO EN ATLÁNTICA XXII Nº 53, NOVIEMBRE DE 2017

Deja un comentario