Piénsolo

VANESA GUTIERREZ MROJASVanessa Gutiérrez / De los primeros díes na Facultá de Derechu quedáronme dalgunos conceptos y recuerdos claros. Por exemplu, que la manumisión ye un actu mui guapu pa escenificar nel aula, pal espantu de los alumnos nuevos y indecisos que se ven intimidaos pol espectáculu de la guiyada. Esta sensación nun inclúi, por supuesto, a aquellos qu’aparecieron na primer clase vistíos con traxe y corbata, garraos col alma a un maletu dispuestu p’acompañase yá de la toga y esi pretendíu estatus social que se remarca pola simple apariencia. Otramanera aprendiéronnos que la xusticia ye un conceptu dafechu suxetivu qu’habíemos desterrar del nuestru vocabulariu corriente. Y quedóme tamién aquel cartelu de “Prohibido fumar”, que dalguién arregló con procuru y paciencia hasta llograr calcar la tipografía pa que se lleere “Prohibido no fumar porros”. Un guiñu a la normalidá y a ciertu sentíu del humor que relaxaba la tensión llatente nos antroxaos prematuramente de péritos. Pero, sobre too, quedóme un chiste d’otru de los docentes col que me sentí darréu dafechu identificada: “–Señor xuez, tengo una duda. Si agora qu’usté m’acaba meter la pena máxima por un delitu de mierda, yo-y digo que me parez usté un fíu de puta, ¿pásame dalgo? –Home, pues lóxicamente acusarélu d’un delitu d’inxuries graves y tendrá qu’atenese a otra condena nueva. –¿Y si en vez de dici-ylo namás lo pienso? –Entós nun-y pasaría nada. El pensamientu nun puedo xulgalu. –Ah, mui bien. Pues nun lo digo, pero que conste que ye lo que pienso”.

Si nun nombres dalgo nun existe. Una fórmula que munches veces aplicamos na cotidianidá pa evitar que se manifieste un pensamientu negativu como realidá irremediable, y que ye aplicada dende tolos órdenes de la vida. Por eso a veces nun nos importa mantener relaciones tóxiques o anodines siempre y cuando la imaxe d’esa relación dea’l pegu. Tampoco nos importa defraudar al d’al llau, anque sí nos agobia que lo manifieste. Cuidámonos más de que se faiga la quexa, que de nun favorecer la razón pa que se produza. O formulao d’otra manera: nun nos importa la verdá, sinón la so apariencia. Ye por esa razón tamién que, nesti mundu de corrección política nel que vivimos –lléase tamién cinismu–, nesti cementeriu retóricu llamáu Europa, como diría Philippe-Joseph Salazar, tamos más esprecetaos pola manifestación de la voluntá que pola voluntá en sí mesma. D’ehí qu’esti filósofu francés dedique tou un ensayu a analizar la palabra como arma. En resume, ficímonos correctos, convencímonos de que somos la culminación del discursu del mundu, y tamién nos volvimos hipócrites. Porque si bien nesti tiempu, na xestión verbal del otru, aprendimos del poder del llinguaxe y a espresanos con propiedá, pasando a dicir atrocidaes nazis en vez d’atrocidaes alemanes, o a referinos a la lliberación d’un país en vez de comentar la so derrota, de rebote aprendimos a pervertilu y a utilizalu como una ferramienta de represión y d’ataque frente al contrariu.

Tamién el lexislador ye consciente del poder de la verbalización y negando esa posibilidá oculta los sentimientos que yá nun se manifiesten. Y como resultáu d’esi aprendizaxe tenemos el nuestru derechu a la llibertá d’espresión menguando na mesma proporción en qu’aumenten les ferramientes comunicatives. Poco hai qu’añedir, nesi sentíu, sobre la llei bautizada con sarcasmu como de Seguridá Ciudadana, más que la sospecha de qu’empezamos a escaecenos de qu’existe a nun ser cuando se dan situaciones sangrantes o surrealistes. Y si tragamos con un ordenamientu xurídicu qu’en regulaciones como esta coarta hasta lo intolerable, cómo nun vamos pasar ensin danos cuenta del carácter despóticu qu’escuende lo políticamente correcto. Nun importa lo qu’esmolez a la población. Importa que calle y nun lo demuestre.

Viendo la dinámica na qu’avanza esti vieyu mundu, viénenme a la memoria aquelles llecciones primeres. Que cualquier norma puede modificase al caprichu de quien lo tenga a la mano, y que da igual que nos conformemos con remuñar lo xusto o lo inxusto, porque ye más la impotencia qu’un derechu de los ciudadanos. Qu’hai xente, solo fachada, a la que-y va la vida en tar penriba, y, utilitaristes y autoritarios, quieren tener la guiyada y con ella la potestá de someter o lliberar lo que meyor-yos convenga. Y cavilo tamién nesa feble lexitimidá que, visto lo visto, nun sé yá si tenemos. La de tar jodíos pero poder dicir que, si esto ye lo qu’hai, esto otro ye lo que yo pienso.

PUBLICADO EN ATLÁNTICA XXII Nº 45, JULIO DE 2016

Deja un comentario