El Torollu, casu empantanáu

La llaguna del Torollu fai unos años, cuando podía vese. Semeya / Mario Rojas.

Rafa Balbuena / Periodista.

La llaguna del Torollu ye una charca artificial creada hai mediu sieglu nun castañéu de la fastera norte de San Cloyo, n’Uviéu. Ye la única mancha d’agua d’entidá nel conceyu y, anque accidental, supón un puntu de gran interés faunísticu y floral, razón pola qu’hai quince años que l’Ayuntamientu uvieín entamó un procesu p’adquirir el suelu del entornu y facer d’él un espaciu natural protexíu. Ensin embargu, lo qu’en so día taba empobinao a ser una midida exemplar acabó derivando nun episodiu irresoluble, con traces de novela kafkiana.

A día de güei, lo que yera un terrén aspirante a la calificación ZEPA (Zona Especial de Protección d’Aves) ta abandonáu y ensin que naide se responsabilice de mantenelu. Y too tres d’una permuta mal resuelta, protestes vecinales, repartos catastrales ensin acreditar, insultos inxertaos na Wikipedia (nun ye broma), promeses ellectorales de tolos colores, un xuiciu qu’invalidó la compraventa y, pa finar l’esperpentu, una sentencia que la propia xudicatura califica de “inejecutable”. Col Torollu y sos agües estancaes (lliteral y llegalmente), los protagonistes llaváronse les manes y los vecinos de San Cloyo, a la postre, acarreten colos llodos acumulaos d’años de promeses non cumplíes.

Charca accidental

La llaguna ñaciera d’un entemez de circunstancies diverses. Primeramente, Loza de San Claudio entamó delles escavaciones acabante la década de los cincuenta nun terrén próximu a les sos instalaciones. La famosa industria –pesllada definitivamente hai siete años– foi a atopar esti oportunu yacimientu d’arciella como materia prima pa los sos productos. Sicasí, anque la veta taba a escasos 500 metros de la fábrica, la empresa abandonóla al pocu, dexando un furacu considerable en mediu’l bosque. Esto yera al filu de 1968, y énte la presencia d’una fonte cercana colos sos respectivos acuíferos, la profundidá algamada pela obra, la orografía del llugar y la escorrentía de les lluvies, nun tardó n’estancase una bayura d’agua que formó, como de sutrucu, una llaguna mui peculiar. Tanto que ye, a día de güei y como yá se dixera más enriba, l’únicu humedal permamente de tol conceyu uvieín.

Col tiempu, l’espoxigue de flora llacustre y l’asentamientu d’aves que nun yeren habituales na zona propició que la charca algamare una importancia ecolóxica inesperada pa naturalistes y científicos. Tamién ye un atractivu pa los senderistes y aficionaos al monte, que tienen –si los imponderables d’accesibilidá estacional nun lo ponen mui cuesta arriba– una llaguna de cinco hectárees d’estensión y cuatro metros de profundidá, en mediu d’un bosque d’alisea y castañal, a poco más de diez minutos n’autobús del centru d’Uviéu.

Esti valor paisaxísticu vien de la mano del so interés biolóxicu, que yá se manifestó dende bien ceo. A la par de constituise como hábitat afayadizu pa especies peculiares de páxaros como la cirombella o’l verderón lúgano, o de ser parada migratoria de patos azulones, zarcetes o cuyarones, nel Torollu consten poblaciones asentaes d’anfibios protexíos como la rana de San Antón, el tritón xaspeáu o’l sapu parteru ibéricu. El CSIC y la Universidá d’Uviéu yá publicaran en 1979 un primer trabayu sobre’l plancton de les sos agües, apurriendo datos d’interés científicu novedosos y dando asina l’avisu de que’l Torollu yá nun yera un estanquín de lluvies, sinón un emplazamientu hídricu d’entidá. Pa bien o pa mal, dalgún desaprensivu tuvo amás la idea d’echar ellí el conteníu de la pecera doméstica, y a resultes d’ello na charca existe agora una población de carpes roxes, siendo esta, que se sepa, la única especie piscícola introducida –nunca meyor dicho– nesti inesperáu biotopo.

La pallabra “inesperáu” vien correctamente al casu, y en más d’un sentíu: per un lláu, nun hai una sola señal o cartelu qu’indique la existencia del humedal, nin muncho menos les víes afayadices d’accesu nin les especies que lu habiten. Caminos vecinales hai dellos, pero dependen siempre de que los propietarios de les finques collindantes tean pol llabor de segar los praos que lu circunden. Asina, daquién con remangu p’adientrase nel bosque campu a traviés, amás d’arramplar coles yerbes altes y toa una bayura d’insectos, tien qu’echar tiempu pa asegurase per ónde s’entra, amás de mirar mui bien qué pisa. Nun ye solo que la charca tea toa arrodiada de castañal y carbayos; siendo como ye artificial, nun tien les orielles bien acolmataes y pal non avezáu surde de sópitu, col riesgu de llevar un somorguión repentín y un eventual rescate que val más nun imaxinar.

Wikipedia presta atención al enguedeyu xurídicu del Torollu.

Llaberintu burocráticu

Un axetivu como “inesperáu” ye tamién el que meyor define’l procesu de venta o permuta de los terrenos de la llaguna’l Torollu, que’entamaron en 2003 y tán tovía enredaos nun verdaderu culebrón cuyu elencu d’actores inclúi al Ayuntamientu, l’empresariu Severino García Vigón y los propios habitantes de San Cloyo. El serial ta nesti momentu nun cafiante anticlímax nel que’l llugar goza –ye un dicir– d’un estatus d’indefinición xurídica y catastral, bordiando l’abandonu de lo qu’un día diba ser un espaciu de protección ambiental y qu’anguaño bancia ente la frustración, la desidia y la velea pa los afectaos.

El casu empezó en 2002, cuando l’Ayuntamientu, entós rexíu por Gabino de Lorenzo, entamó’l procesu de compra al so propietariu, Severino García Vigón, dueñu d’Energía Astur y, daquella, presidente de la FADE. Vigón comprára-y les finques a Loza San Claudio en 1981, y tres de valorar dellos proyectos pa la charca –toos de calter industrial–, abrió en 2003 les negociaciones, nun tira y afloxa llargu que se concretó finalmente en 2007. L’alcuerdu algamáu fixó la permuta de les 4,5 hectárees del Torollu por cinco parceles nel Polígonu Industrial d’Olloniegu. Pero too argayó cuando varios vecinos de San Cloyo reclamaron la propiedá castastral de delles zones del terrén, permutaes a sos espaldes. Llegóse a xuiciu y, siete años depués, la xudicatura dio-yos definitivamente la razón a los querellantes. La transacción anulóse.

Entrín y non, García Vigón vendiera dos de les parceles d’Olloniegu, entrando n’escena nuevos actores ensin arte nin parte nel casu. El cuadru colapsó y la sentencia declaróse inexecutable. Vigón desentendióse del asuntu, aduciendo que la operación taba cerrada, y preguntáu güei por esti tema, l’empresariu insiste en que pa él “el Torollu es asunto olvidado”, toa vez que “los tribunales nos dieron la razón y poco hay que añadir”. L’Ayuntamientu fixo igual y dexólo correr. Volvióse asina al statu quo, naide paez saber nada, l’escaezu devién solución de (in)compromisu y el llugar ta como la selva, pa plasmu de los vecinos.

A esti respective, l’actual conceyal de Mediu Ambiente d’Uviéu, Ignacio Fernández del Páramo, confirma la importancia ecolóxica de la llaguna y almite qu’esti problema “lleva ya quince años estancado, nunca mejor dicho, porque la sentencia obligó a revertir la permuta de parcelas y en este tiempo, dos de las de Olloniego fueron revendidas y ahora tienen nuevos propietarios”. El procesu ta atoráu, y pa desbloquealu paez que solo queda dir “por la vía de la expropiación”, aclara l’edil. Sicasí, “antes de entrar en otro proceso judicial, es mejor tratarlo en buenos términos con el propietario”, afirma Del Páramo, qu’otra miente reconoz que no que va de llexislatura, “todavía no hemos hablado nada de esto con García Vigón” ni colos dueños de les finques del pleitu.

San Cloyo, l’otru Uviéu

Dende mediaos los años noventa, l’apalancamientu del casu viénenlu recordando de xemes en cuando el movimientu ecoloxista uvieín y los propios vecinos de San Cloyo. Izquierda Xunida fizo del Torollu un caballu de batalla nes últimes elecciones municipales, anque agora l’asuntu paez condicionáu por otres prioridaes. Les coses nun cambiaron muncho nun pueblín de contrastes dientro d’un conceyu de perestremaes característiques. Mientres la capital ye símbolu de l’Asturies puxante, San Cloyo lleva décades somorguiáu neso que, con daqué calter despectivu pero abondo clarividente, dio en llamase “l’Uviéu probe”.

Teresa Álvarez ye vecina del pueblu y vive nuna casa cercana al Torollu. Tien mui claro que “esto ta mui dejao de la mano de Dios”. Hai que matizar que Dios, nesti casu, ye tanto’l Principáu como l’Ayuntamientu. “Solo se acuerden de nosotros pa les elecciones”, protesta, y pon d’exemplu la carretera de Ponteo, que bordea la llaguna y la so finca pa dar cola AS-232. “Hasta que nun se pusieron de acuerdo unos y otros tuvieron años con la carretera olvidá, y mirar ahora: ta otra vez toa llena de baches”, llamenta. A tantu abandonu siguen más consecuencies: “¿Veis toa esa tierra? Toles noches me la dejen así los jabalíes”, esplica mientres apunta pa unos terrazos fozaos nel so xardín. “Ye que vien a la barrera a beber”, diz enantes d’aclararianos que la barrera ye la llaguna. Llámenla asina pol so usu primeru: la estracción de barru qu’abrió Loza de San Claudio mediu sieglu atrás. Agora paez que los xabariles seyan los únicos contentos con tolo que ta pasando ellí.

PUBLICADO EN ATLÁNTICA XXII Nº 47, NOVIEMBRE DE 2016

Deja un comentario