Tres persones encausaes por visibilizar y denunciar la violencia machista

Pasucáis de xineru de 2015 cuando ocurrieron los fechos, con una pancarta reproducción d’aquella pola que multaron a tres persones comprometíes cola llucha contra la violencia machista.

Laura Marcos y Fabiola Quiroga / Muyeres en Llucha de la Corriente Sindical de Izquierdas (CSI).

La nueche del 31 d´avientu al 1 de xineru tiense xeneralmente por una ocasión festiva, que se presta a los escesos; y tamién propicia pa facer bonos propósitos col envís de camudar aquelles coses que nun nos prestaron de los años anteriores. Precisamente con esa intención, na madrugada del 1 de xineru de 2015, tres persones comprometíes cola llucha contra la violencia machista decidieron recolocar na valla que zarraba’l solar de l’antigua estación del tren de Xixón una pancarta qu’atoparon arrancada del mesmu sitiu, col lema: “2015 llibre de machismu y de represión”. Entós nun podíen imaxinar qu’esi fechu diba a llevalos a acabar la nueche en Comisaría y, tres años más tarde, a los tribunales. Sobre too cuando nesi mesmu sitiu fueron colgaes posteriormente más pancartes de partíos políticos o con reivindicaciones vecinales nes que participaba hasta l’Ayuntamientu.

Al acabar de recolocar la pancarta, una patrulla de la policía llocal de Xixón párales y píde-yos la documentación, que dos d’estes persones nun teníen consigo. A resultes d’esto, son llevaes a Comisaría, onde permanecen reteníes hasta que-yos garren los datos, yá de mañana, y-yos informen de qu’esperen una multa de 200 euros por persona por actuar contra la ordenanza municipal que prohíbe poner carteles fuera de los llugares establecíos nella. Les tres persones afectaes niéguense a pagar la multa por motivos éticos y recurren, la situación denúnciase públicamente y llega a entamase una concentración frente a la policía local de Xixón pola so actuación desproporcionada. Anguaño los fechos yá se daben por prescritos; sicasí, ye agora, casi tres años dempués, cuando estes tres persones reciben citaciones pa otros tantos xuicios onde –yos piden l’importe de la multa más los intereses acumulaos. Estos xuicios van celebrase’l 23 de xineru (dos d’ellos), a les 10:30 h, y el 14 de febreru a les 11:30 h nos xulgaos de Xixón.

Ye difícil entender esta zuna por perseguir esta actuación, en particular cuando, repetimos, en munches otres ocasiones se tienen visto pancartes nel mesmu sitiu por otres causes que nun fueron castigaes nin muncho menos. Per otru llau, resulta ablucante hasta’l puntu la hipocresía qu’un conceyu nel que l’alcadesa ye a un tiempu la responsable del área d’Igualdá, que diz tar comprometíu cola llucha contra’l machismu y la violencia machista, qu’hasta llega a colocar él mesmu cartelos a la entrada de la villa alertando de que “Xixón nun permite les agresiones sexistes”, lleve a cabu esta acción represiva al traviés de la so Policía Local. Y ye pa preguntase ¿nun ye esmolecedor que lo faga esta fuerza, que diz tar formada y sensibilizada p’atender a les víctimes d’esta lacra social y la que davezu tien qu’intervenir en casu d’agresión machista?

En solidaridá coles víctimes d’esta persecución absurda hai convocaes concentraciones a la entrada de los xuicios, y va facese mención tamién a la manifestación que con motivu del entamu d’añu saldrá’l día 18 de xineru de la Plaza L’Humedal (Xixón) a les 19:30 hores pa denunciar toles violencies machistas. En cualquier casu, parez nidia la necesidá de siguir saliendo a la cai a denunciar toles violencies que vivimos sólo por ser muyeres, y cada vez que se dea un casu d’asesinatu machista, visibilizando y reivindicando a toles víctimes que son, desgraciadamente, munches más que les que contabiliza la llei de violencia de xéneru. El añu 2017 terminamos con la escalofriante cifra de 115 víctimes. Recordemos que na mano de toes y toos ta construyir la sociedá que queremos.

Deja un comentario