Connect with us

Atlántica XXII

‘Nun tamos toes’, la xera de visibilizar

Afondando

‘Nun tamos toes’, la xera de visibilizar

Esti proyectu reivindicativu xune tradición y modernidá sobro la pandereta, unu de los instrumentos más singulares, escaecíu y desprestixáu de la música asturiana. Tornando cantares a lletres feministes. Y emplegando de manera natural l’asturianu como llingua vehicular

Foto: Imanol Rimada.

Elena Plaza | Periodista

@Elena_PlazaD

Si nun fora la pandereta sedría otra cosa la qu’interconeutaría los espacios, los sentires y les ganes, les caleyes peles que s’entemecen les vides y faen atopar xente diverso que complementa’l puzle de caún y caúna. Y esto ye lo que vieno a pasar nel Centru Social d’El Remediu (Nava), onde confluyeron los astros y axuntaron a trece persones que parieron ‘Nun tamos toes’, un proyeutu reivindicativu qu’acueye tradición y modernidá alrodiu de la pandereta, ún de los instrumentos más singulares, enforma escaecíu y desprestixáu, de la música asturiana. Tornando cantares a lletres feministes. Y emplegando de manera natural l’asturianu como llingua vehicular. Más desprestixu.

Dicir que tas deprendiendo a tocar la pandereta (o’l panderu) ye motivu de risión. Yera l’instrumentu que se-yos dexaba tocar a les viudes: d’esti xeitu podíen dir de xaréu tando perbién controlaes, nun fora a ser… O a les solteres que, si dempués de casaes queríen siguir, teníen que pidi-y permisu al home. La pandereta tocábase de manera informal p’animar les xuntances por tres o cuatro muyeres del pueblu, pero cuando llegaben les fiestes grandes, entós contratábase al gaiteru y al tamboriteru de turnu, homes los dos.

Falar asina de la pandereta ye falar asina de les muyeres. Y viéronlo claro dendel’entamu de les clases de pandereta que punxeron nel Centru Social d’El Remediu. Costába-yos cantar determinaos cantares de lletres machistes, monárquiques, picardioses… Lletres que nun dexaben en bon sitiu a les muyeres y que “nun podíemos cantar con sentimientu”. Y eso nos tiempos que cuerren nun tien munchu sentíu, sobre too en víespores del 8M, estímulu de la conciencia feminista, igual na que tien raigaños que na qu’emprincipia a espertar, “ye la sensación d’haber una enerxía nel mundu, de muyeríu con conciencia. La mani dio fuercies a tol mundu”. Y ehí xurdieron.

Afirmen les trece integrantes de ‘Nun somos toes’, doce muyeres y un home de la redolada de Nava que “un pueblu vivu evoluciona respeuto a la tradición”. Y evoluciona igual pa contar les coses que se sienten, qu’esmolecen, que son actualidá (daqué que yá facía la tradición y que dacuando tornaba la danza en palos), que pa sacar una llingua d’un muséu y facela de vida, de cotidianeidá.

El casu ye que llegó el 8M y la coordinadora feminista gallega modernizó un cantar tradicional con una lletra feminista, ‘Vai tu, vou eu, vai ela’, que dio la idea a esti coleutivu astur pa facer daqué paecío, xurdiendo ‘Los sueltos’ (que pue sentise na web d’ATLÁNTICA, el so cantar de presentación, xunto con ‘L’amudar’, dambes sobre dos melodíes tradicionales).

Foto: Imanol Rimada.

Trabayando siempre dende’l respetu y el cariñu a lo tradi, yá que munches d’elles siguen cantándolo y ye la base, entamaron a camudar lletres nes que falen de toes aquelles coses qu’esmolecen na cotidianeidá. Y ensin vistir el traxe tradicional. Nun ye fácil, los más conservadores nun lo ven bien, “y amás somos muyeres y nun podemos salinos del sitiu; si ye Rodrigo Cuevas ta bien, pero nosotres… Somos necies y vamos siguir p’alantre”.

Canten pa elles mesmes, col enfotu de recuperar espacios propios perdíos ente maternidaes, otru puntu d’alcuentru ente elles, de visibilizar a les muyeres y a les muyeres na cultura y na música. Pero nestos pocos meses camudaron yá nun fenómenu, participando en manifestaciones (“ye otra manera de tar, en cuenta de la pancarta llevamos la pandereta”), conciertos y demás actos reivindicativos. Porque too nesta vida ye política», fasta ser apolítica. Y qué meyor que reivindicar con allegría, baillando, porque “el procesu de cambéu nun ye d’amargura. Y como diz Emma Goldman, “si nun puedo baillar, la to revolución nun m’interesa”.

Y too contao na llingua del país, “una ferramienta útil, moderna, qu’hai qu’incorporar a la vida diaria”. Una forma más de facer militancia. Y de siguir recuperando espacios propios y ayenos, como una de les muries na cai Amparo Pedregal d’Uviéu, dientro del Parees Fest.

LAURA LAGO FERNÁNDEZ

Foto: Imanol Rimada.

La trayeutoria de Laura, enfermera col enfotu de ser matrona, sal d’Avilés, pasa per Uviéu, onde vivió y estudió Bioloxía, apara en Llazana (Les Regueres) cola so quesería que nun pudo superar la crisis, y fina n’Ovín (Nava). La maternidá dio-y otru puntu de vista, que-y paez mui dura y qu’aparta a les muyeres del activismu mentes nun s’atopen espacios comunes propios y de compartimientu coles criatures. “Ye importante facer coses que te gusten ensin arrenunciar a la crianza. Y equí teximos una rede d’apoyu ente nosotres, que veníemos munches del mundu feminista y del asturianu”.

PAULA CRISTOBAL CASO

Foto: Imanol Rimadas.

Podría dicise que ye la más esperimentada nesto de la pandereta a cuenta de la so trayeutoria en grupos de baille y n’Herbamora, un grupu de pandereteres tradicionales. Nacida en Trubia, asentó n’El Remediu y agora vive cerquina d’ellí, con un proyeutu d’agricultura ecolóxica, amás de ser mayestra d’asturianu. Ta encantada con esti grupu y col proyeutu que creció tan rápido: “hai qu’aprovechar los momentos vitales que xurden, ye un emburrión pa danos más ánimu”. Reconoz que’l míticu grupu etnográficu Muyeres ye tou un referente, pero que-y apetecía evolucionar un poquiñín, y ‘Nun tamos toes’ ye “un pasu más, muyeres de güei que cuenten coses de güei”. Y cuéntenles n’asturianu, exerciendo una militancia activa y cotidiana.

ROSA CAÑADAS GÓMEZ

Foto: Imanol Rimada.

De Madrid, llegó a Asturies dende Inglaterra. Ellí ya participó nun coru interxeneracional de muyeres que tamién tornaben cantares con lletres reivindicatives, diben a manifestaciones… Nesa contorna descubrió lo cómoda que taba n’espacios de muyeres. Averóse al folclor astur de la qu’asitió n’Avilés (güei vive en Bimenes) y comenta que ye “una mala señal pa una llingua que nun se defina”, faciendo referencia al falar amestao, en cuenta d’emplegar dos llingües estremaes, como ye’l casu d’otres oficiales.

ESTHER BARROSO LLAVONA

Imagen: Imanol Rimada.

Foi hippie “de llibru, cuando selo yera una profesión y yéremos una minoría que nun dábemos la lata” naquellos años 80, los de la llucha del feminismu a favor del albuertu, cuando Uviéu yera una ciudá de grises y azules marinos, delantre los pantalones de pana mariello qu’Esther usaba. Nestos tiempos modernos cree que “volvimos mui p’atrás, como coles llibertaes…”, por eso diz que “hai que dar caña, que nun s’acaben d’enterar”, y por eso dempués de “vieya, fíxime panderetera”, anque siempre tuvo rellacionada col mundu del baille na Andecha Folclor d’Uviéu. Con raigaños en Cabranes, percorrió mundo fasta volver p’Asturies con “monazo de prau. Nun soi nada urbana”.

ANDREA ALONSO

Foto: Imanol Rimada.

Ye la más nueva y, de recién, estrena maternidá. Pensó que diba tener qu’aparar, pero reconoz l’acompañamientu de la so pareya, y ehí sigue, dándo-y a la pandereta, cola que tenía una cuenta pendiente. De fechu, ye una de les cites más importantes de la selmana, dir a clas. Destaca l’amistá fecha, la posibilidá de compartir la maternidá, el día a día, les coses de la güerta…  Agora ta metanes del subidón tres de parir va tres meses y ruempe col estereotipu de qu’al tener fíos nun se pue facer ná de lo qu’antes se facía: ella lleva a Xaira a los ensayos y conciertos. Asitiada en Bimenes, natural de Xomezana (L.lena), busca siempre lo rural y l’activismu social.

LENA REDONDO VIADO

Foto: Imanol Rimada.

Lena foi de vacaciones pal pueblu un branu y ya nun volvió a aquel quintu ensin ascensor d’Uviéu. El Remediu paeció-y la meyor opción pa criar a los peques, como se criara ella. Amás, el Centru Social, xestionáu pola asociación de vecinos taba mui vivu, un caldu cultural qu’en xeneral valió-yos pa muncho. Fasta qu’entamaren les denuncies d’una pareya vecina, que-y molestaba l’actividá y que finó, dempués de venti años, col pieslle burocráticu del centru onde se desendolcaben una llarga llista de talleres y alcuentros que daben vida a tola redolada. N’El Remediu atopóse de nueves con xente de siempre, los que quedaron y otros que retornaron. Ellí cría a la neña y al neñu muncho más tranquila, disfrutando d’ello y sabiendo que tien una vida meyor que n’Uviéu, anque ellí fora bien activa, implicada cola Xunta pola Defensa de la Llingua Asturiana.

EIDER GOÑI URIBEETXEBERRIA

Foto: Imanol Rimada.

Vasca d’Eibar, vieno a vivir pa Llanes con 16 años pa dempués treslladase a Uviéu y mezclase col activismu social d’ellí. Marchó mundu alantre p’acabar buscando’l verde d’Euskadi o d’Asturies. El Remediu foi’l destín final, onde atopó unes cuantes families grandes con un movimientu social fuerte y alternativu, “nun ye un neopaisanismu al usu”. La maternidá tamién y-cambió la perspeutiva feminista, reinventándose dende la economía de los cuidaos, l’ecofeminismu… “un cambéu de mentalidá mui importante”. Una vez nel campu necesitaba atopar de nueves esos espacios que-y permitieren la militancia. “Cuando maternes pones la enerxía y el focu n’otru puntu”. Autora de delles lletres de los cantares, fala n’asturianu pola sensibilidá como euskaldún al vivilo na ikastola nun ambiente non abertzale, “la reivindicación llingüística y cultural vien de serie. Siento muncha almiración: tantu trabayu y tan pocos frutos, pero con renovación xeneracional”.

SOCO FUENTES MIRANDA

Foto: Imanol Rimada.

L’últimu añu de mayestra trabayólu en Nava dempués de 35 años en Xixón, onde tuvo mui implicada nel activismu social. Al conceyu sidreru volvieron ella y el maríu pa vivir la xubilación. Les compañeres defínenla como mui activa. Y ella reconozlo, “al tar xubilada quería tener el tiempu ocupáu en coses que me gusten”. Y afirma tar mui enganchada a la pandereta. Ye la manera de tener la cabeza ocupada, de falar… anque ye cobarde, quier más escuchar. Ye la más veterana del grupu, pero nun ye consciente de la edá que tien, namás si la piensa.

MARÍA RODRÍGUEZ

Foto: Imanol Rimada.

Escapó de Xixón va unos cuantos años coles ximielgues y la pareya y va un par d’años qu’alcontraron el llugar perfeutu n’El Remediu. Animadora sociocultural, pasó de trabayar con guah.es a trabayar con xente mayor, dalgo qu’en parte agradez a la hora de baxar el ritmu, “que tamién me faigo mayor”. Mui implicada nel activismu social xixonés, esti ritmu rompió cola maternidá. Realcontrólu col grupu d’El Remediu, onde coincidió en paeceres ya idees. “El ser madre ye un frenu nesti activismu al llegar tan tarde a la maternidá, al tar tan afitada na vida social”, y nota’l cambéu xeneracional nesi sen porque “les madres d’antes yérenlo más xóvenes”. Equí resúlta-y más fácil conciliar.

EMMA POSADA

Foto: Imanol Rimada.

Nuna ocasión sintió dicir a Rodrigo Cuevas “qué guapo ye nacer nuna casa onde se canta”. Y pue qu’aquel comentariu fora’l xerme de les clases de pandereta n’El Remediu. Emma tien dos fíos y daquella munches ganes de cantar y tocar. Pedagoga y profesora d’asturianu en Secundaria, tamién foi monitora nos scouts. Al nacer el fíu mayor desconeutó de too pa centrase na crianza. Tiempu que se-y da a los demás, a los cuidaos. Y agora necesita recuperar esi tiempu pa ella, como-yos pasa a les demás integrantes. “Cuéstame salir de casa pa xuntes y asina. Necesito participar pero ensin sentime obligada, eso ye fundamental”. La pandereta y el club de ciclismu femenín Una a una nel que participa ocupen esi tiempu propiu.

LUCÍA VEGA FUENTES

Foto: Imanol Rimada.

Con 25 años mercara una pandereta ensin saber y yera una espina clavada que tenía fasta apuntase a la Escuela de Música de Nava, con David Varela. Al mesmu tiempu entamaren les clases con Paulino Santirso n’El Remediu. Entós ye cuando xurdió esti proyeutu que-y presta un montón: per un llau la pandereta y per otru llevar “un rollu más reivindicativu, como nel que me crié. Esti grupu faite crecer a la vez que crez el grupu”. Y ye que Lucía, fía de Soco, nacida n’El Natahoyo de Xixón, vivió tolos movimientos sociales de los años 90 naquella ciudá. “Pillóme tol esmantelamientu de la industria, Moreda y toa aquella zona, fui al Institutu númberu 7… y eso fórxate. Los mios pas tamién taben mui implicaos. Tuvi na Xunta Moza, xuntéme con Grieska, Andecha, Insumisión…”. Y agora, que tien dos rapacines, que lleva 13 años viviendo en Buyeres (Nava), va recuperando espacios de la que les neñes ganen n’autonomía “y daste cuenta de tolo que perdisti. Estos espacios son de reafirmación y recuperación. Pola condición de muyer tengo la sensación de renunciar más que dellos paisanos”.

SAÚL CORRAL VEGA

Foto: Imanol Rimada.

Ta sorprendíu de formar parte del grupu. “Tengo tanto mieu a ser el típicu paisanu que-yos diz a les muyeres lo que tienen que facer, que quiero más quedar en segundu planu”, y porque tamién sabe lo que ye sufrir homofobia y por ser home cuidador de so ma y so pá, a lo que munchos paisanos nun tan avezaos. “Tengo claro que’l grupu ye d’elles. Tienen una fuercia arrolladora y confluyeron toes xuntes. Son espectaculares”. Y lo que fai ye “deprender. La mayoría de los paisanos que se declaren non machistes, al escarbar un pocu… vése la educación machista que toos tuvimos. Toi deprendiendo muncho de feminismu real y de pa ónde ha caminar la sociedá”, la que va atopar el so fíu.

BEATRIZ REDONDO VIADO

Foto: Imanol Rimada.

Foi direutora del periódicu Les Noticies y caleya ente’l periodismu, la educación, l’activismu políticu, social y llingüísticu. Dende lo político, ‘Nun tamos toes’ tien el so puntu d’orixinalidá frente a los eslóganes repetitivos: “divertímonos”. Dende’l feminismu, ye otra forma de contar y de que llegue meyor que delles esplicaciones aburríes. Bea de momentu nun toca, pero bailla, “otra manera de facer activismu”, y ye, con Eider, la otra compositora del grupu, un llabor collaborativu, a la espera de que s’animen otres a escribir.

 

XOTA DE LES MUYERES D’EL REMEDIU

Consuelo, Teresa, La Pura, Isolina

La Eugenia, Encarna, Pausides

Vangelina, Leonides,

La Fera, La Sima, Nides, Belarmina

N’alborada les muyeres

baxen a la llechería

y dexen los sos bidones

nel ríu al pie de la vía

Hai baile en casa Blanca

Ai, moza porqué nun vienes

qu’echando unos buenos bailes

marchen fuera toles penes

El martes mercáu na Pola

Mercedes va vender güevos

falten los que comió l’home

nin pa ella nin pa los neños

Si les neñes d’El Remediu

van a La Piedra a cereces

en saliendo Margarita

Ai! ya nun son tan valientes

Lucinda garrate’l baxu

nel mediu de la cocina

de tola xente del pueblu

tien garrada la midida.

Cuándo semando’l maíz

Cuándo na Biesca sallando

Cuándo camín del molín

Felicita va cantando

 

GAZA

Nun ye que sía un desastre,

catástrofe natural,

décades d’ocupación,

ocupación illegal.

Mirái, ye Gaza, resiste

once años de bloquéu.

nun digáis que nun lo viestis,

sábenlo yá hasta n’Uviéu.

Yera namás una neña,

Nun la llames terrorista.

Na so manina una piedra,

Los sos güeyos yá ensin vida.

“La flotilla” pela mar,

Chalanes de llibertá.

Empobínenles a Gaza,

busquen puertu y dignidá.

Dieciséis años tenía,

Ahed Tamimi foi presa.

Escontra l’artillería,

La so cara descubierta.

De qué proporción me fales

Una bala siempre mata.

Si una muria equí me llantes

Lo que toca ye valtala.

Papel moyao na ONU

Palestina sigue igual.

Esti silenciu inhumanu

Gaza nun lu aguanta más.

 

¡SÍGUENOS!

SUSCRIPCIÓN EN PAPEL

A través del teléfono (637259964 o 984109610) o el correo letrasatlanticas@gmail.com

Continue Reading
Click to comment

You must be logged in to post a comment Login

Leave a Reply

Más en la categoría Afondando

  • Afondando

    La última nigromante

    By

    Un retrato de A Bruxa de Brañavara, nacida hace cien años y una de las últimas...

  • Afondando

    La maraña del enchufismo

    By

    Artículo publicado en el número 61 de nuestra edición de papel (marzo de 2019) como inicio...

  • Afondando

    País

    By

      Artículo publicado en el número 61 de la edición de papel del número 61 de...

  • Afondando

    El Daglas

    By

    Cuento e ilustraciones extraídos del libro Los niños de humo, de la editorial Pez de Plata,...

  • Afondando

    El espejo ultra de Salvini

    By

    Esta artículo pertenece al número 60 de ATLÁNTICA XXII. El país que fue referente de la...

Último número

To Top

Centro de preferencias de privacidad

Necessary

Advertising

Analytics

Other